శ్రీమద్రామాయణము - అయోధ్యాకాండ
అష్టనవతితమ సర్గము
నివేశ్య సేనాం తు విభుః పద్భ్యాం పాదవతాం వరః |
అభిగన్తుం స కాకుత్థ్సమియేష గురువర్తకమ్ || ౧
నివిష్టమాత్రే సైన్యే తు యథోద్దేశం వినీతవత్ |
భరతో భ్రాతరం వాక్యం శత్రుఘ్నమిదమబ్రవీత్ || ౨
క్షిప్రం వనమిదం సౌమ్య! నరసఙ్ఘై స్సమన్తతః |
లుబ్ధైశ్చ సహితైరేభి స్త్వమన్వేషితుమర్హసి || ౩
గుహో జ్ఞాతిసహస్రేణ శరచాపాసిధారిణా |
సమన్వేషతు కాకుత్స్థమస్మిన్ పరివృతస్స్వయమ్ || ౪
అమాత్యై స్సహ పౌరైశ్చ గురుభిశ్చ ద్విజాతిభిః |
వనం సర్వం చరిష్యామి పద్భ్యాం పరివృత స్స్వయమ్ || ౫
యావన్న రామం ద్రక్ష్యామి లక్ష్మణం వా మహాబలమ్ |
వైదేహీం చ మహాభాగాం న మే శాన్తిర్భవిష్యతి || ౬
యావన్న చన్ద్రసఙ్కాశం ద్రక్ష్యామి శుభమాననమ్ |
భ్రాతుః పద్మపలాశాక్షం న మే శాన్తిర్భవిష్యతి || ౭
యావన్న చరణౌ భ్రాతుః పార్థివవ్యఞ్జనాన్వితౌ |
శిరసా ధారయిష్యామి న మే శాన్తిర్భవిష్యతి || ౮
యావన్న రాజ్యే రాజ్యార్హః పితృపైతామహే స్థితః |
అభిషేకజలక్లిన్నో న మే శాన్తిర్భవిష్యతి || ౯
సిద్ధార్థః ఖలు సౌమిత్రిర్యశ్చన్ద్రవిమలోపమమ్ |
ముఖం పశ్యతి రామస్య రాజీవాక్షం మహాద్యుతి || ౧౦
కృతకృత్యా మహాభాగా వైదేహీ జనకాత్మజా |
భర్తారం సాగరాన్తాయాః పృథివ్యా యానుగచ్ఛతి || ౧౧
సుభగశ్చిత్రకూటోసౌ గిరిరాజోపమో గిరిః |
యస్మిన్వసతి కాకుత్స్థః కుబేర ఇవ నన్దనే || ౧౨
కృతకార్యమిదం దుర్గం వనం వ్యాలనిషేవితమ్ |
యదధ్యాస్తే మహాతేజా రామ శ్శస్త్రభృతాం వరః || ౧౩
ఏవముక్త్వా మహాతేజా భరతః పురషర్షభః |
పద్భ్యామేవ మహాబాహుః ప్రవివేశ మహాద్వనమ్ || ౧౪
స తాని ద్రుమజాలాని జాతాని గిరిసానుషు |
పుష్పితాగ్రాణి మధ్యేన జగామ వదతాం వరః || ౧౫
స గిరేశ్చిత్రకూటస్య సాలమాసాద్య పుష్పితమ్ |
రామాశ్రమగతస్యాగ్నేర్దదర్శ ధ్వజముచ్ఛ్రితమ్ || ౧౬
తం దృష్ట్వా భరత శ్రీమాన్ముమోద సహ బాన్ధవః |
అత్ర రామ ఇతి జ్ఞాత్వా గతః పారమివామ్భసః || ౧౭
స చిత్రకూటే తు గిరౌ నిశమ్యవ రామాశ్రమం పుణ్యజనోపపన్నమ్ |
గుహేన సార్ధం త్వరితో జగామ పునర్నివేశ్యైవ చమూం మహాత్మా || ౧౮
ఇత్యార్షే శ్రీమద్రామాయణే వాల్మీకీయ ఆదికావ్యే అయోధ్యాకాణ్డే అష్టనవతితమస్సర్గః