Bala Kanda - Sarga 20 | బాలకాండ - వింశస్సర్గః
Back to Stotras తిరిగి వెళ్ళండి

Bala Kanda - Sarga 20 బాలకాండ - వింశస్సర్గః

శ్రీమద్రామాయణము - బాలకాండ

వింశ సర్గము

తచ్ఛ్రుత్వా రాజశార్దూలో విశ్వామిత్రస్య భాషితమ్
ముహూర్తమివ నిస్సంజ్ఞస్సంజ్ఞావానిదమబ్రవీత్ 1

ఊనషోడశవర్షో మే రామో రాజీవలోచన:
న యుద్ధయోగ్యతామస్య పశ్యామి సహ రాక్షసై: 2

ఇయమక్షౌహిణీ పూర్ణా యస్యాహం పతిరీశ్వర:
అనయా సంవృతో గత్వా యోద్ధాహం తైర్నిశాచరై: 3

ఇమే శూరాశ్చ విక్రాన్తా భృత్యా మేస్త్రవిశారదా: యోగ్యా రక్షోగణైర్యోద్ధుం న రామం నేతుమర్హసి 4

అహమేవ ధనుష్పాణిర్గోప్తా సమరమూర్ధని
యావత్ప్రాణాన్ధరిష్యామి తావద్యోత్స్యే నిశాచరై: 5

నిర్విఘ్నా వ్రతచర్యా సా భవిష్యతి సురక్షితా
అహం తత్రాగమిష్యామి న రామం నేతుమర్హసి 6

బాలో హ్యకృతవిద్యశ్చ న చ వేత్తి బలాబలమ్
న చాస్త్రబలసంయుక్తో న చ యుద్ధవిశారద: 7

న చాసౌ రక్షసాం యోగ్య: కూటయుద్ధా హి తే ధ్రువమ్
విప్రయుక్తో హి రామేణ ముహూర్తమపి నోత్సహే 8

జీవితుం మునిశార్దూల! న రామం నేతుమర్హసి
యది వా రాఘవం బ్రహ్మన్నేతుమిచ్ఛసి సువ్రత 9

చతురఙ్గసమాయుక్తం మయా చ సహితం నయ
షష్టిర్వర్షసహస్రాణి జాతస్య మమ కౌశిక 10

దు:ఖేనోత్పాదితశ్చాయం న రామం నేతుమర్హసి
చతుర్ణామాత్మజానాం హి ప్రీతి:పరమికా మమ 11

జ్యేష్ఠం ధర్మప్రధానం చ న రామం నేతుమర్హసి
కింవీర్యా రాక్షసాస్తే చ కస్య పుత్రాశ్చ తే చ కే 12

కథం ప్రమాణా: కే చైతాన్రక్షన్తి మునిపుఙ్గవ కథం చ ప్రతికర్తవ్యం తేషాం రామేణ రక్షసామ్ 13

మామకైర్వా బలైర్బ్రహ్మన్మయా వా కూటయోధినామ్
సర్వం మే శంస భగవన్కథం తేషాం మయా రణే 14

స్థాతవ్యం దుష్టభావానాం వీర్యోత్సిక్తా హి రాక్షసా: తస్య తద్వచనం శ్రుత్వా విశ్వామిత్రోభ్యభాషత 15

పౌలస్త్యవంశప్రభవో రావణో నామ రాక్షస:
స బ్రహ్మణా దత్తవరస్త్రైలోక్యం బాధతే భృశమ్ 16

మహాబలో మహావీర్యో రాక్షసైర్బహుభిర్వృత: శ్రూయతే హి మహావీర్యో రావణో రాక్షసాధిప: 17

సాక్షాద్వైశ్రవణభ్రాతా పుత్రో విశ్రవసో మునే: యదా స్వయం న యజ్ఞస్య విఘ్నకర్తా మహాబల: 18

తేన సఞ్చోదితౌ ద్వౌ తు రాక్షసౌ వై మహాబలౌ
మారీచశ్చ సుబాహుశ్చ యజ్ఞవిఘ్నం కరిష్యత: 19

ఇత్యుక్తో మునినా తేన రాజోవాచ మునిం తదా
న హి శక్తోస్మి సఙ్గ్రామే స్థాతుం తస్య దురాత్మన: 20

స త్వం ప్రసాదం ధర్మజ్ఞ! కురుష్వ మమ పుత్రకే
మమ చైవాల్పభాగ్యస్య దైవతం హి భవాన్గురు: 21

దేవదానవగన్ధర్వా యక్షా:పతగపన్నగా: న శక్తా రావణం సోఢుం కిం పునర్మానవా యుధి 22

స హి వీర్యవతాం వీర్యమాదత్తే యుధి రాక్షస:
తేన చాహం న శక్తోస్మి సంయోద్ధుం తస్య వా బలై 23

సబలో వా మునిశ్రేష్ఠ సహితో వా మమాత్మజై: కథమప్యమరప్రఖ్యం సఙ్గ్రామాణామకోవిదమ్
బాలం మే తనయం బ్రహ్మన్ నైవ దాస్యామి పుత్రకమ్ 24

అథ కాలోపమౌ యుధ్దే సుతౌ సున్దోపసున్దయో: యజ్ఞవిఘ్నకరౌ తౌ తే నైవ దాస్యామి పుత్రకమ్ 25

మారీచశ్చ సుబాహుశ్చ వీర్యవన్తౌ సుశిక్షితౌ
తయోరన్యతరేణాహం యోధ్దా స్యాం ససుహృద్గణ: 26

ఇతి నరపతిజల్పనాద్ద్విజేన్ద్రం కుశికసుతం సుమహాన్వివేశ మన్యు: సుహుత ఇవ మఖేగ్నిరాజ్యసిక్త స్సమభవదుజ్జ్వలితో మహర్షివహ్ని: 27

ఇత్యార్షే శ్రీమద్రామాయణే వాల్మీకీయ ఆదికావ్యే బాలకాణ్డే వింశస్సర్గః