శ్రీమద్రామాయణము - బాలకాండ
ఏకవింశ సర్గము
తచ్ఛ్రుత్వా వచనం తస్య స్నేహపర్యాకులాక్షరమ్
సమన్యు: కౌశికో వాక్యం ప్రత్యువాచ మహీపతిమ్ 1
పూర్వమర్థం ప్రతిశ్రుత్య ప్రతిజ్ఞాం హాతుమిచ్ఛసి
రాఘవాణామయుక్తోయం కులస్యాస్య విపర్యయ: 2
యదీదం తే క్షమం రాజన్! గమిష్యామి యథాగతమ్
మిథ్యాప్రతిజ్ఞ: కాకుత్స్థ! సుఖీభవ సబాన్ధవ: 3
తస్య రోషపరీతస్య విశ్వామిత్రస్య ధీమత:
చచాల వసుధా కృత్స్నా వివేశ చ భయం సురాన్ 4
త్రస్తరూపం తు విజ్ఞాయ జగత్సర్వం మహానృషి:
నృపతిం సువ్రతో ధీరో వసిష్ఠో వాక్యమబ్రవీత్ 5
ఇక్ష్వాకూణాం కులే జాతస్సాక్షాద్ధర్మ ఇవాపర:
ధృతిమాన్ సువ్రత: శ్రీమాన్నధర్మం హాతుమర్హసి 6
త్రైషు లోకేషు విఖ్యాతో ధర్మాత్మా ఇతి రాఘవ
స్వధర్మం ప్రతిపద్యస్వ నాధర్మం వోఢుమర్హసి 7
సంశ్రుత్యైవం కరిష్యామీత్యకుర్వాణస్య రాఘవ
ఇష్టాపూర్తవధో భూయాత్తస్మాద్రామం విసర్జయ 8
కృతాస్త్రమకృతాస్త్రం వా నైనం శక్ష్యన్తి రాక్షసా:
గుప్తం కుశికపుత్రేణ జ్వలనేనామృతం యథా 9
ఏష విగ్రహవాన్ ధర్మ ఏష వీర్యవతాం వర:
ఏష బుధ్యాధికో లోకే తపసశ్చ పరాయణమ్ 10
ఏషోస్త్రాన్ వివిధాన్వేత్తి త్రైలోక్యే సచరాచరే
నైనమన్య: పుమాన్వేత్తి న చ వేత్స్యన్తి కేచన 11
న దేవా నర్షయ: కేచిన్నాసురా న చ రాక్షసా:
గన్ధర్వయక్షప్రవరాస్సకిన్నరమహోరగా: 12
సర్వాస్త్రాణి భృశాశ్వస్య పుత్రా: పరమధార్మికా:
కౌశికాయ పురా దత్తా యదా రాజ్యం ప్రశాసతి 13
తేపి పుత్రా భృశాశ్వస్య ప్రజాపతిసుతాసుతా:
నైకరూపా మహావీర్యా దీప్తిమన్తో జయావహా: 14
జయా చ సుప్రభా చైవ దక్షకన్యే సుమధ్యమే
తే సువాతేస్త్రశస్త్రాణి శతం పరమభాస్వరమ్ 15
పఞ్చాశతం సుతాన్ లేభే జయా నామ పరాన్ పురా
వధాయాసురసైన్యానామమేయాన్ కామరూపిణ: 16
సుప్రభాజనయచ్చాపి పుత్రాన్పఞ్చాశతం పున:
సంహారాన్నామదుర్ధర్షాన్ దురాక్రామాన్ బలీయస: 17
తాని చాస్త్రాణి వేత్త్యేష యథావత్కుశికాత్మజ:
అపూర్వాణాం చ జననే శక్తో భూయస్స ధర్మవిత్ 18
ఏవం వీర్యో మహాతేజా విశ్వామిత్రో మహాయశాః
న రామగమనే రాజన్! సంశయం కర్తుమర్హసి 19
తేషాం నిగ్రహణే శక్తస్స్వయం చ కుశికాత్మజ:
తవ పుత్రహితార్థాయ త్వాముపేత్యాభియాచతే 20
ఇతి మునివచనాత్ప్రసన్నచిత్తో రఘువృషభస్తు ముమోద భాస్వరాఙ్గ:
గమనమభిరురోచ రాఘవస్య ప్రథితయశా: కుశికాత్మజాయ బుధ్యా 21
ఇత్యార్షే శ్రీమద్రామాయణే వాల్మీకీయే ఆదికావ్యే బాలకాణ్డే ఏకవింశస్సర్గ: