శ్రీమద్రామాయణము - బాలకాండ
షట్చత్వారింశ సర్గము
హతేషు తేషు పుత్రేషు దితి: పరమదు:ఖితా
మారీచం కాశ్యపం రామ భర్తారమిదమబ్రవీత్ 1
హతపుత్రాస్మి భగవంస్తవ పుత్రైర్మహాబలై:
శక్రహన్తారమిచ్ఛామి పుత్రం దీర్ఘతపోర్జితమ్ 2
సాహం తపశ్చరిష్యామి గర్భం మే దాతుమర్హసి
ఈశ్వరం శక్రహన్తారం త్వమనుజ్ఞాతుమర్హసి 3
తస్యాస్తద్వచనం శ్రుత్వా మారీచ: కాశ్యపస్తదా
ప్రత్యువాచ మహాతేజా దితిం పరమదు:ఖితామ్ 4
ఏవం భవతు, భద్రం తే శుచిర్భవ తపోధనే! జనయిష్యసి పుత్రం త్వం శక్రహన్తారమాహవే 5
పూర్ణే వర్షసహస్రే తు శుచిర్యది భవిష్యసి
పుత్రం త్రైలోక్యభర్తారం మత్తస్త్వం జనయిష్యసి 6
ఏవముక్త్వా మహాతేజా: పాణినా స మమార్జ తామ్
సమాాలభ్య తతస్స్వస్తీత్యుక్త్వా స తపసే యయౌ 7
గతే తస్మిన్నరశ్శ్రేష్ఠ దితి: పరమహర్షితా
కుశప్లవనమాసాద్య తపస్తేపే సుదారుణమ్ 8
తపస్తస్యాం హి కుర్వన్త్యాం పరిచర్యాం చకార హ
సహస్రాక్షో నరశ్శ్రేష్ఠ పరయా గుణసమ్పదా 9
అగ్నిం కుశాన్ కాష్ఠమప: ఫలం మూలం తథైవ చ
న్యవేదయత్సహస్రాక్షో యచ్చాన్యదపి కాఙ్క్షితమ్ 10
గాత్రసంవహనశ్చైవ శ్రమాపనయనైస్తథా
శక్రస్సర్వేషు కాలేషు దితిం పరిచచార హ 11
అథ వర్షసహస్రే తు దశోనే రఘునన్దన ! దితి: పరమసమ్ప్రీతా సహస్రాక్షమథాబ్రవీత్ 12
యాచితేన సురశ్రేష్ఠ తవ పిత్రా మహాత్మనా
వరో వర్షసహస్రాన్తే దత్తో మమ సుతం ప్రతి 13
తపశ్చరన్త్యా వర్షాణి దశ వీర్యవతాం వర!
అవశిష్టాని భద్రం తే భ్రాతరం ద్రక్ష్యసే తత: 14
తమహం త్వత్కృతే పుత్ర సమాధాస్యే జయోత్సుకమ్
త్రైలోక్యవిజయం పుత్ర సహ భోక్ష్యసి విజ్వర: 15
ఏవముక్త్వా దితిశ్శక్రం ప్రాప్తే మధ్యం దివాకరే
నిద్రయాపహృతా దేవీ పాదౌ కృత్వాథ శీర్షత: 16
దృష్ట్వా తామశుచిం శక్ర: పాదత: కృతమూర్ధజామ్
శిరస్స్థానే కృతౌ పాదౌ జహాస చ ముమోద చ 17
తస్యాశ్శరీరవివరం వివేశ చ పురన్దర:
గర్భం చ సప్తధా రామ బిభేద పరమాత్మవాన్ 18
భిద్యమానస్తతో గర్భో వజ్రేణ శతపర్వణా
రురోద సుస్వరం రామ తతో దితిరబుధ్యత 19
మా రుదో మా రుదశ్చేతి గర్భం శక్రోభ్యభాషత
బిభేద చ మహాతేజా రుదన్తమపి వాసవ: 20
న హన్తవ్యో న హన్తవ్య ఇత్యేవం దితిరబ్రవీత్
నిష్పపాత తతశ్శక్రో మాతుర్వచనగౌరవాత్ 21
ప్రాఞ్జలిర్వజ్రసహితో దితిం శక్రోభ్యభాషత
అశుచిర్దేవి సుప్తాసి పాదయో: కృతమూర్ధజా 22
తదన్తరమహం లబ్ధ్వా శక్రహన్తారమాహవే
అభిదం సప్తధా దేవి తన్మే త్వం క్షన్తుమర్హసి 23
ఇత్యార్షే శ్రీమద్రామాయణే వాల్మీకీయే ఆదికావ్యే బాలకాణ్డే షట్చత్వారింశస్సర్గ: