శ్రీమద్రామాయణము - బాలకాండ
సప్తచత్వారింశ సర్గము
సప్తధాతు కృతే గర్భే దితి: పరమదు:ఖితా
సహస్రాక్షం దురాధర్షం వాక్యం సానునయాబ్రవీత్ 1
మమాపరాధాద్గర్భోయం సప్తధా విఫలీకృత:
నాపరాధోస్తి దేవేశ! తవాత్ర బలసూదన! 2
ప్రియం తు కర్తుమిచ్ఛామి మమ గర్భవిపర్యయే
మరుతాం సప్తసప్తానాం స్థానపాలా భవన్త్విమే 3
వాతకన్ధా ఇమే సప్త చరన్తు దివి పుత్రక
మారుతా ఇతి విఖ్యాతా దివ్యరూపా మమాత్మజా: 4
బ్రహ్మలోకం చరత్వేక ఇన్ద్రలోకం తథాపర:
దివి వాయురితి ఖ్యాతస్తృతీయోపి మహాయశా: 5
చత్వారస్తు సురశ్రేష్ఠ దిశో వై తవ శాసనాత్
సఞ్చరిష్యన్తు భద్రం తే దేవభూతా మమాత్మజా: 6
తస్యాస్తద్వచనం శ్రుత్వా సహస్రాక్ష: పురన్దర:
ఉవాచ ప్రాఞ్జలిర్వాక్యం దితిం బలనిషూదన: 7
సర్వమేతద్యథోక్తం తే భవిష్యతి న సంశయ:
విచరిష్యన్తు భద్రం తే దేవభూతాస్తవాత్మజా: 8
ఏవం తౌ నిశ్చయం కృత్వా మాతాపుత్రౌ తపోవనే
జగ్ముస్త్రిదివం రామ కృతార్థావితి నశ్శ్రుతమ్ 9
ఏష దేశస్స కాకుత్స్థ మహేన్ద్రాధ్యుషిత: పురా
దితిం యత్ర తపస్సిద్ధామేవం పరిచచార స: 10
ఇక్ష్వాకోస్తు నరవ్యాఘ్ర పుత్ర: పరమధార్మిక:
అలమ్బుషాయాముత్పన్నో విశాల ఇతి విశ్రుత:
తేన చాసీదిహ స్థానే విశాలేతి పురీ కృతా 11
విశాలస్య సుతో రామ హేమచన్ద్రో మహాబల:
సుచన్ద్ర ఇతి విఖ్యాత: హేమచన్ద్రాదనన్తర: 12
సుచన్ద్రతనయో రామ ధూమ్రాశ్వ ఇతి విశ్రుత:
ధూమ్రాశ్వతనయశ్చాపి సఞ్జయస్సమపద్యత 13
సఞ్జయస్య సుతశ్శ్రీమాన్ సహదేవ: ప్రతాపవాన్
కుశాశ్వస్సహదేవస్య పుత్ర: పరమధార్మిక: 14
కుశాశ్వస్య మహాతేజా సోమదత్త: ప్రతాపవాన్
సోమదత్తస్య పుత్రస్తు కాకుత్స్థ ఇతి విశ్రుత: 15
తస్య పుత్రో మహాతేజా: సమ్ప్రత్యేష పురీమిమామ్
ఆవసత్యమరప్రఖ్యస్సుమతిర్నామ దుర్జయ: 16
ఇక్ష్వాకోస్తు ప్రసాదేన సర్వే వైశాలికా నృపా:
దీర్ఘాయుషో మహాత్మానో వీర్యవతస్సుధార్మికా: 17
ఇహాద్య రజనీం రామ సుఖం వత్స్యామహే వయమ్
శ్వ: ప్రభాతే నరశ్రేష్ఠ జనకం ద్రష్టుమర్హసి 18
సుమతిస్తు మహాతేజా విశ్వామిత్రముపాగతమ్
శ్రుత్వా నరవరశ్రేష్ఠ: ప్రత్యుద్గచ్ఛన్మహాయశా: 19
పూజాం చ పరమాం కృత్వా సోపాధ్యాయస్సబాన్ధవ:
ప్రాఞ్జలి: కుశలం పృష్ట్వా విశ్వామిత్రమథాబ్రవీత్ 20
ధన్యోస్మ్యనుగృహీతోస్మి యస్య మే విషయం ముని:
సమ్ప్రాప్తో దర్శనం చైవ నాస్తి ధన్యతరో మమ 21
ఇత్యార్షే శ్రీమద్రామాయణే వాల్మీకీయే ఆదికావ్యే బాలకాణ్డే సప్తచత్వారింశస్సర్గ: