శ్రీమద్రామాయణము - బాలకాండ
సప్తసప్తతితమ సర్గము
గతే రామే ప్రశాన్తాత్మా రామో దాశరథిర్ధను:
వరుణాయాప్రమేయాయ దదౌ హస్తే ససాయకమ్ 1
అభివాద్య తతో రామో వసిష్ఠప్రముఖానృషీన్
పితరం విహ్వలం దృష్ట్వా ప్రోవాచ రఘునన్దన: 2
జామదగ్న్యో గతో రామ: ప్రయాతు చతురఙ్గిణీ
అయోధ్యాభిముఖీ సేనా త్వయా నాథేన పాలితా 3
సన్దిశస్వ మహారాజ సేనాం త్వచ్ఛాసనే స్థితామ్
శాసనం కాఙ్క్షతే సేనా చాతకాలిర్జలం యథా 4
రామస్య వచనం శ్రుత్వా రాజా దశరథ స్సుతమ్
బాహుభ్యాం సమ్పరిష్వజ్య మూర్ధ్ని చాఘ్రాయ రాఘవమ్ 5
గతో రామ ఇతి శ్రుత్వా హృష్ట: ప్రముదితో నృప:
పునర్జాతం తదా మేనే పుత్రమాత్మానమేవ చ 6
చోదయామాస తాం సేనాం జగామాశు తత: పురీమ్
పతాకాధ్వజినీం రమ్యాం తూర్యోద్ఘుష్టనినాదితామ్ 7
సిక్తరాజ పథాం రమ్యాం ప్రకీర్ణకుసుమోత్కరామ్
రాజప్రవేశసుముఖై: పౌరైర్మఙ్గలవాదిభి: 8
సమ్పూర్ణాం ప్రావిశద్రాజా జనౌఘైస్సమలఙ్కృతామ్
పౌరై: ప్రత్యుద్గతో దూరం ద్విజైశ్చ పురవాసిభి:
పుత్రైరనుగత శ్శ్రీమాన్ శ్రీమద్భిశ్చ మహాయశా: 9
ప్రవివేశ గృహం రాజా హిమవత్సదృశం పునః
ననన్ద సజనో రాజా గృహే కామై స్సుపూజిత: 10
కౌసల్యా చ సుమిత్రా చ కైకేయీ చ సుమధ్యమా
వధూప్రతిగ్రహే యుక్తా యాశ్చాన్యా రాజయోషిత: 11
తతస్సీతాం మహాభాగామూర్మిలాం చ యశస్వినీమ్
కుశధ్వజసుతే చోభే జగృహుర్నృపపత్నయ: 12
మఙ్గలాలమ్భనైశ్చాపి శోభితా: క్షౌమవాసస:
దేవతాయతనాన్యాశు సర్వాస్తా: ప్రత్యపూజయన్ 13
అభివాద్యాభివాద్యాంశ్చ సర్వా రాజసుతాస్తదా
స్వం స్వం గృహమథాసాద్య కుబేరభవనోపమమ్ 14
గోభిర్ధనైశ్చ ధాన్యైశ్చ తర్పయిత్వా ద్విజోత్తమాన్
రేమిరే ముదితా: సర్వా భర్తృభి: సహితా రహ: 15
కుమారాశ్చ మహాత్మానో వీర్యేణాప్రతిమా భువి
కృతదారా: కృతాస్త్రాశ్చ సధనా: ససుహృజ్జనా: 16
శుశ్రూషమాణా: పితరం వర్తయన్తి నరర్షభా:
కస్యచిత్త్వథ కాలస్య రాజా దశరథ: సుతమ్ 17
భరతం కైకయీపుత్ర మబ్రవీద్రఘునన్దన:
అయం కేకయరాజస్య పుత్రో వసతి పుత్రక 18
త్వాం నేతుమాగతో వీర యుధాజిన్మాతులస్తవ
ప్రార్థితస్తేన ధర్మజ్ఞ మిధిలాయామహం తథా 19
ఋషిమధ్యే తు తస్య త్వం ప్రీతిం కర్తుమిహార్హసి
శ్రుత్వా దశరథస్యైతద్భరత: కైకయీసుత: 20
అభివాద్య గురుం రామం పరిష్వజ్య చ లక్ష్మణమ్
గమనాయాభిచక్రామ శత్రుఘ్నసహితస్తదా 21
ఆపృచ్ఛ్య పితరం శూరో రామం చాక్లిష్టకారిణమ్
మాతృశ్చాపి నరశ్రేష్ఠ శ్శత్రుఘ్నసహితో యయౌ 22
గతే తు భరతే రామో లక్ష్మణశ్చ మహాబల: పితరం దేవసంఙ్కాశం పూజయామాసతుస్తదా 23
పితురాజ్ఞాం పురస్కృత్య పౌరకార్యాణి సర్వశ:
చకార రామో ధర్మాత్మా ప్రియాణి చ హితాని చ 24
మాతృభ్యో మాతృకార్యాణి కృత్వా పరమయన్త్రిత:
గురూణాం గురుకార్యాణి కాలే కాలేన్వవైక్షత 25
ఏవం దశరథ: ప్రీతో బ్రాహ్మణ నైగమాస్తథా
రామస్య శీలవృత్తేన సర్వే విషయవాసిన: 26
తేషామతియశా లోకే రామ స్సత్యపరాక్రమః
స్వయంభూరివ భూతానాం బభూవ గుణవత్తర: 27
రామస్తు సీతయా సార్ధం విజహార బహూనృతూన్
మనస్స్వీ తద్గతస్తస్యాః నిత్యం హృది సమర్పిత: 28
ప్రియా తు సీతా రామస్య దారా: పితృకృతా ఇతి
గుణాద్రూపగుణాచ్చాపి ప్రీతిర్భూయోభ్యవర్ధత 29
తస్యాశ్చ భర్తా ద్విగుణం హృదయే పరివర్తతే
అన్తర్జాతమపి వ్యక్తమాఖ్యాతి హృదయం హృదా 30
తస్య భూయో విశేషేణ మైథిలీ జనకాత్మజా
దేవతాభి స్సమా రూపే సీతా శ్రీరివ రూపిణీ 31
తయా స రాజర్షిసుతోభిరామయా సమేయివానుత్తమరాజకన్యయా
అతీవ రామ శ్శుశుభేభిరామయా
విభు శ్శ్రియా విష్ణురివామరేశ్వర: 32
ఇత్యార్షే శ్రీమద్రామాయణే వాల్మీకీయే ఆదికావ్యే బాలకాణ్డే సప్తసప్తతితమస్సర్గ: