శ్రీ ధర్మశాస్తా పంచకం
పాదారవిందభక్తలోకపాలనైకలోలుపం
సదారపార్శ్వమాత్మజాదిమోదకం సురాధిపం |
ఉదారమాదినాథభూతనాథమద్భుతాత్మవైభవం
సదా రవీందుకుండలం నమామి భాగ్యసంభవం || ౧ ||
కృపాకటాక్షవీక్షణం విభూతివేత్రభూషణం
సుపావనం సనాతనాదిసత్యధర్మపోషణం |
అపారశక్తియుక్తమాత్మలక్షణం సులక్షణం
ప్రభామనోహరం హరీశభాగ్యసంభవం భజే || ౨ ||
మృగాసనం వరాసనం శరాసనం మహౌజసం
జగద్ధితం సమస్తభక్తచిత్తరంగసంస్థితం |
నగాధిరాజరాజయోగపీఠమధ్యవర్తినం
మృగాంకశేఖరం హరీశభాగ్యసంభవం భజే || ౩ ||
సమస్తలోకచింతితప్రదం సదా సుఖప్రదం
సముత్థితాపదంధకారకృంతనం ప్రభాకరమ్ |
అమర్త్యనృత్తగీతవాద్యలాలసం మదాలసం
నమస్కరోమి భూతనాథమాదిధర్మపాలకమ్ || ౪ ||
చరాచరాంతరస్థిత ప్రభామనోహర ప్రభో
సురాసురార్చితాంఘ్రిపాదపద్మ భూతనాయక |
విరాజమానవక్త్ర భక్తమిత్ర వేత్రశోభిత
హరీశభాగ్యజాత సాధుపారిజాత పాహి మామ్ || ౫ ||
ఇతి శ్రీ ధర్మశాస్తా పంచకం సంపూర్ణం ||