శ్రీ విష్ణోరష్టావింశతినామ స్తోత్రం
అర్జున ఉవాచ
కిం ను నామ సహస్రాణి జపతే చ పునః పునః |
యాని నామాని దివ్యాని తాని చాచక్ష్వ కేశవ || ౧ ||
శ్రీభగవానువాచ
మత్స్యం కూర్మం వరాహం చ వామనం చ జనార్దనమ్ |
గోవిన్దం పుండరీకాక్షం మాధవం మధుసూదనమ్ || ౨ ||
పద్మనాభం సహస్రాక్షం వనమాలిం హలాయుధమ్ |
గోవర్ధనం హృషీకేశం వైకుంఠం పురుషోత్తమమ్ || ౩ ||
విశ్వరూపం వాసుదేవం రామం నారాయణం హరిమ్ |
దామోదరం శ్రీధరం చ వేదాఙ్గం గరుడధ్వజమ్ || ౪ ||
అనన్తం కృష్ణగోపాలం జపతో నాస్తి పాతకమ్ |
గవాం కోటిప్రదానస్య అశ్వమేధశతస్య చ || ౫ ||
కన్యాదానసహస్రాణాం ఫలం ప్రాప్నోతి మానవః |
అమాయాం వా పౌర్ణమాస్యామేకాదశ్యాం తథైవ చ || ౬ ||
సంధ్యాకాలే స్మరేన్నిత్యం ప్రాతఃకాలే తథైవ చ |
మధ్యాహ్నే చ జపన్నిత్యం సర్వపాపైః ప్రముచ్యతే || ౭ ||
ఇతి శ్రీకృష్ణార్జునసంవాదే శ్రీవిష్ణోరష్టావింశతినామస్తోత్రం సంపూర్ణమ్ |